Babae, nadiskubreng plastik ang halaman matapos diligan, alagaan ng 2 taon

Proud na proud pa ang isang mommy mula California dahil napaabot umano niya ng dalawang taon ang inaalagaan niyang halaman sa loob ng kanyang bahay.

Ayon kay Caelie Wilkes, bihira raw kasi ang mga kayang magpatagal ng halaman dahil marahil sa araw-araw na obligasyon ng pag-aalaga nito.

Ngunit ang kasiyahan ng ginang ay biglang nauwi sa katatawanan nang madiskubre niyang peke at plastik pala ang halamang ipinagmamalaki niya.

Nalaman niya ang matagal na sikreto nang tanggalin niya ito sa paso para ilipat sa magandang vase na kanyang nakita.

Dahil sa labis na gulat ay ibinahagi niya sa kanyang Facebook ang kanyang kwento noong Pebrero 28.

Aniya, “I put so much love into this plant! I washed its leaves. Tried my hardest to keep it looking it’s best, and it’s completely plastic! How did I not know this?”

Kwento pa niya, nang alisin niya ang naturang halaman ay nakadikit pa ito sa isang styrofoam na may peke ring buhangin.

“I feel like these last two years have been a lie,” giit niya.

Agad na nagviral online ang kanyang post na agad namang naitampok sa iba’t ibang stations gaya ng Radio 2, the New York Post at Good Morning America.

Samantala, dahil dito ay naghandog ang Home Depot ng totoong halaman kay Caelie para umano makapag-alaga na siya ng buhay at tunay na pananim.