Video ng fast food service crew na nakapasa sa LET, umantig sa mga netizens

Isang video ng isang female fast food service crew ang nagbigay ng inspirasyon sa mga netizens matapos niyang malaman na siya ay pumasa sa Licensure Examination for Professional Teachers (LET/LEPT) noong Biyernes, Disyembre 13.

Sa viral na video na kuha ng kanyang kasamahan na si Caizer Jhon Lumibao, makikita ang magkasama nilang tinitingnan ang resulta ng board exam sa cellphone sa Professional Regulation Commission (PRC).

Habang nagtatrabaho, hindi mapigilan ni Lyka Jane Nagal, ang board passer, ang magsaya at magsayaw nang matutunan niyang pumasa siya sa LET at naging ganap na teacher na.

Kaagad niyang ipinaabot ang kanyang tagumpay sa kanyang pamilya, lalo na sa kanyang ina.

Matapos ang ilang sandali, umupo si Lyka sa isang sulok at naging emosyonal. Nang maglaon, tumayo siya at nagpatuloy sa kanyang trabaho.

Ang video na ito ay nakakuha na ng milyong views sa iba't ibang platform, hanggang sa pagsulat ng artikulong ito.

Maligayang bati, Teacher Lyka!